Ikipe ya Arsenal yongeye kwisubiza umwanya wa mbere muri Premier League n'ikinyuranyo cy'amanota atanu, nyuma yo gutsinda Chelsea ibitego 2-1 mu mukino w'ishiraniro wabereye kuri Emirates Stadium kuri iki Cyumweru, tariki ya 1 Werurwe 2026.
Uyu mukino wabaye nyuma y'uko Manchester City itsinze Leeds United ku wa Gatandatu igakuramo ikinyuranyo kikagera ku manota abiri, wasabaga Arsenal gukoresha imbaraga zose kugira ngo ikomeze urugendo rwo gushaka igikombe cya mbere cya Shampiyona kuva mu 2004.
Nubwo umukino watangiranye igitutu, Arsenal yafunguye amazamu ku munota wa 21 binyuze kuri koruneri, ibanga ikomeje kubyaza umusaruro muri uyu mwaka.
Gabriel Magalhães yateye umutwe ashyira umupira kwa William Saliba, na we wawuteje umutwe ukora ukuboko kwa Mamadou Sarr wa Chelsea wari wabanje mu kibuga bwa mbere, uruhukira mu nshundura.
Icyakora, Chelsea ntiyacitse intege kuko na yo yaje gukoresha intwaro nk'iyo, yishyura igitego mu minota y'inyongera y'igice cya mbere (45+2'). Ku mupira mwiza wari utewe na kapiteni Reece James kuri koruneri, Piero Hincapié wa Arsenal yawukozeho unyura ku munyezamu David Raya wijyana mu izamu, amakipe ajya mu karuhuko anganya 1-1.
Igice cya kabiri cyatangiranye imbaraga kuri Chelsea yotsa igitutu Arsenal, ndetse iza kubona uburyo bwiza ku munota wa 63 ariko umunyezamu David Raya akora akazi gakomeye akuramo umupira wari utewe na Joao Pedro n'umutwe, yongera no gukiza izamu ku mupira wari uhinduwe na Alejandro Garnacho.
Nyuma yo kurokoka ibi bitero, Arsenal yongeye kwiyambaza intwaro yayo ya za koruneri. Ku munota wa 66, Declan Rice yateye koruneri nziza cyane izamuka igana mu izamu, isanga Jurrien Timber ahagaze neza ayishyira mu nshundura n'umutwe, umunyezamu Robert Sanchez wari wabangamiwe na mugenzi we Andrey Santos ntiyabasha gutabara.
Iki cyabaye igitego cya 16 Arsenal itsinze binyuze muri koruneri muri uyu mwaka w'imikino, ikaba yageze ku gahigo ka Premier League kigeze gukorwa na Oldham (1992-93), West Brom (2016-17) ndetse na yo ubwayo (2023-24).
Ibya Chelsea byaje kuzamba ku munota wa 70 ubwo Pedro Neto, wari wamaze guhabwa ikarita y'umuhondo azira kwitonganya, yakoreraga ikosa rikomeye Gabriel Martinelli wari winjiye asimbuye agashaka kotsa igitutu (counter-attack), umusifuzi Darren England ahita amuha ikarita ya kabiri y'umuhondo ibyara itukura asohoka mu kibuga.
Iyi ibaye ikarita itukura ya karindwi Chelsea ibonye muri Premier League uyu mwaka, n'iya cyenda mu marushanwa yose, ikibazo cyatumye umutoza mushya Liam Rosenior agaragaza ko kibangamiye bikomeye gahunda zabo zo gushaka itike ya Champions League.
Nyuma y'umukino, umutoza wa Arsenal, Mikel Arteta, yashimiye abakinnyi be uburyo bitwaye neza mu gukoresha imipira y'imiterekano.
Yagize ati "Zari ingenzi cyane [za koruneri]. Hari aho twatakaje amanota ku mipira y'imiterekano miremire ariko uyu munsi twayibyaje umusaruro...Zishobora kuba inzozi mbi ku bo muhanganye."
Gutsinda uyu mukino byatumye Arsenal igira amanota 64 ku mwanya wa mbere, isiga Manchester City amanota atanu. Chelsea yo yakomeje gusigara inyuma mu guhatanira umwanya wa kane nyuma y'uko Manchester United na Liverpool zo zatsinze imikino yazo muri izi mpera z'icyumweru.
Mu mikino izakurikiraho kuri uyu wa Gatatu, Arsenal izasura Brighton & Hove Albion, mu gihe Chelsea ifite akazi katoroshye ko gusura Aston Villa idafite Pedro Neto wahagaritswe, hamwe na Cole Palmer ushobora kutabanza mu kibuga kubera ikibazo cy'ubuzima.
