‎Ikipe y'Ingabo z'Igihugu ya APR FC yamaze kumvikana na rutahizamu w'Umunya-Côte d’Ivoire, Amani Kouadio Kan Michel Breygeneve, mu rwego rwo gukomeza kongera amaraso mashya mu busatirizi bwayo.

‎

‎Uyu musore w'imyaka 27 y'amavuko ukina asatira izamu anyuze mu ruhande rw'ibumoso, yerekeje muri iyi kipe nyuma yo kwitwara neza muri Shampiyona y'Icyiciro cya Mbere muri Côte d’Ivoire akinira AFAD Djékanou, aho mu mwaka w'imikino ushize wa 2025/2026 yatsinze ibitego 17.

‎

‎Amakuru ahari ni uko impande zombi zamaze kumvikana ku by'ibanze ndetse uhagarariye uyu mukinnyi akaba ategerejwe mu Murwa Mukuru wa Kigali ku wa Kane kugira ngo ashyire umukono ku masezerano.

‎

‎Uretse guca ibintu muri shampiyona y'iwabo, uyu mukinnyi yanigaragaje mu mikino ya CAF Confederation Cup, aho mu mikino ine yakinnye yatsinzemo ibitego bibiri akanatanga umupira umwe wavuyemo igitego mbere y'uko ikipe ye isezerewe na USM Alger mu ijonjora rya kabiri.

‎

‎Kwinjira kw'uyu musore bije gukemura ikibazo cyo ku ruhande rw'ibumoso rusanzweho Mugisha Gilbert usoje amasezerano, Umunya-Uganda Denis Omedi ugifite amezi atandatu gusa ndetse na Iraguha Hadji usigaranye amasezerano y'umwaka umwe.