Minisitiri w'Imikino muri Iran, Ahmad Donyamali, yatangaje ko iki gihugu kitazitabira imikino y'Igikombe cy'Isi cya 2026 kizabera muri Leta Zunze Ubumwe za Amerika, nyuma y'ibitero bya gisirikare byahitanye Umuyobozi w'Ikirenga wayo Ayatollah Ali Khamenei.

‎

‎Ibi bitero byagabwe na Leta Zunze Ubumwe za Amerika ndetse na Israeli kuva tariki ya 28 Gashyantare 2026, byatumye haduka intambara ikomeye mu Burasirazuba bwo Hagati imaze guhitana abasivile barenga 1,255 ndetse abandi basaga ibihumbi 12 barakomereka.

‎

‎Mu kiganiro yagiranye na televiziyo y'igihugu kuri uyu wa Gatatu, Minisitiri Donyamali yavuze ko bidashoboka ko bakwitabira iri rushanwa kubera ibikorwa by'ubushotoranyi bakorewe. 

‎

Yagize ati "Urebye ukuntu ubu butegetsi bwamunzwe na ruswa bwishe umuyobozi wacu, nta na rimwe twakwitabira Igikombe cy'Isi."

‎

‎Uyu muyobozi yakomeje ashimangira ko abana babo badatekanye, yongeraho ko Leta Zunze Ubumwe za Amerika zatumye binjira mu ntambara ebyiri mu mezi umunani cyangwa icyenda ashize, zikica kandi zikagira ingaruka ku bihumbi by'abaturage babo.

‎

‎Iran ni cyo gihugu cya mbere cyari cyarabonye itike yo gukina iri rushanwa rizahuza amakipe 48 kuva tariki ya 11 Kamena kugeza ku ya 19 Nyakanga 2026 muri Leta Zunze Ubumwe za Amerika, Mexique na Canada.

‎

‎Iyi kipe yari yarashyizwe mu Itsinda G kumwe n'u Bubiligi, Misiri na Nouvelle-Zélande, aho imikino yayo yose y'amatsinda yari iteganyijwe kubera mu mijyi ya Los Angeles na Seattle muri Amerika.

‎

‎Iki cyemezo gishya kije nyuma y'uko Perezida wa FIFA, Gianni Infantino, yari aherutse guhura na Perezida wa Leta Zunze Ubumwe za Amerika, Donald Trump, bagatangaza ko ikipe ya Iran yari ihawe ikaze muri iri rushanwa kugira ngo umupira w'amaguru ukomeze guhuza abatuye isi.

‎

‎Kugeza ubu, Impuzamashyirahamwe y'Umupira w'Amaguru ku Isi (FIFA) ntiragira icyo itangaza kuri uku kwikura mu irushanwa, gusa amategeko yayo ateganya ko ikipe ibikoze habura iminsi iri munsi ya 30 ngo ritangire, icibwa amande asaga ibihumbi 320 by'amadolari ndetse ikaba ishobora no gufatirwa ibindi bihano birimo no kwirukanwa mu yandi marushanwa.