Ikipe ya Arsenal yakomeje kwerekana ko itaje gukina muri uyu mwaka w’imikino, itsinda Bayern Munich ibitego 3-1 mu mukino w’umunsi wa gatanu wa UEFA Champions League, bituma ikomeza kwitwara neza ijana ku ijana muri iri rushanwa.

Uyu mukino wabereye ku kibuga Emirates Stadium, wasize Noni Madueke atsinze igitego cye cya mbere kuva yagera muri Arsenal avuye muri Chelsea aguzwe akayabo ka miliyoni 48.5 z’ama-Pound.

Arsenal yatangiye umukino yotsa igitutu izamu rya Bayern Munich. Ibi byaje gutanga umusaruro ku munota wa 22 ubwo Jurrien Timber yafunguraga amazamu n’umutwe, ku mupira wari uvuye muri koruneri yatewe na Bukayo Saka.

Iki cyari igitego cya 10 Arsenal itsinze ivanye umupira muri koruneri muri uyu mwaka w’imikino, agahigo irusha izindi kipe zose mu mashampiyona atanu akomeye i Burayi.

Bayern Munich yari yabanje gusa n’irushwa, yagarutse mu mukino nyuma y’iminota 10 gusa. Joshua Kimmich yahinduye umupira muremure awuhereza Serge Gnabry wahoze akinira Arsenal, na we ahita awushyira mu rubuga rw’amahina usanga Lennart Karl w’imyaka 17, ahita yishyura igitego cya mbere.

Iki ni cyo gitego cya mbere Arsenal yari yinjijwe muri iri rushanwa muri uyu mwaka, gusa ntibyabaciye intege kuko bakomeje gushaka intsinzi ya gatanu mu mikino itanu.

Mu gice cya kabiri, umutoza Mikel Arteta yakoze impinduka zaje gutanga umusaruro. Noni Madueke yaje guha Arsenal kongera kuyobora umukino, nyuma y’umupira ukomeye wari utewe na Riccardo Calafiori na we winjiye asimbura, Madueke awukoraho gato ujya mu rushundura.

Mu minota ya nyuma, Arsenal yashimangiye intsinzi ubwo Eberechi Eze, uheruka kwitwara neza mu mukino wa Derby y'i Londres, yateraga umupira mwiza cyane urenga ba myugariro ba Bayern, usanga Gabriel Martinelli. Uyu Munya-Brezil yacenze umunyezamu Manuel Neuer wari wasohotse nabi, atsinda igitego cya gatatu.

Mbere y’uyu mukino, abasesengura iby’imikino babonaga Arsenal ifite icyumweru gikomeye imbere yayo kuko yagombaga guhura na Tottenham, Bayern Munich na Chelsea. Gusa, ikipe ya Mikel Arteta yatsinze ibiri ibanza mu buryo bworoshye, harimo uwa Tottenham yanyagiye ibitego bine n’uyu wa Bayern inyagiye bitatu.

Arsenal na Bayern Munich zari zisangiye umwanya wa mbere mbere y’uyu mukino, ariko Arsenal yerekanye ko iri ku rwego rwo hejuru, ikomeza kuyobora urutonde rwa Champions League n’amanota yose.

Ku ruhande rwa Bayern Munich, Harry Kane usanzwe ari rutahizamu ukomeye igenderaho ntiyabashije kwigaragaza kuko yazimiriye hagati ba myugariro ba Arsenal. Mugenzi we Michael Olise uri mu bihe byiza n’ibitego icyenda ndetse n’imipira 10 ivamo ibitego mu mikino 19 gusa, na we yari yabyukiye ibumoso, nubwo yagerageje kugora Myles Lewis-Skelly rimwe na rimwe.

Akarusho ku ruhande rwa Bayern kabaye ukwitwara neza kw’umwana ukiri muto Lennart Karl w’imyaka 17, watsinze igitego mu mukino we wa kabiri gusa abanje mu kibuga muri Champions League.

Gutsinda uyu mukino bivuze ko Arsenal iyoboye urutonde rwa Premier League n’urwa Champions League, ikaba ikomeje kwerekana ko ishaka igikombe cyayo cya mbere gikomeye kuva mu 2020 ubwo yatwaraga FA Cup.