Ubuyobozi bwa Real Madrid bwatangaje ko bwamaze gutandukana n’uwari Umutoza Mukuru w’iyi kipe, Xabi Alonso, nyuma y’iminsi mike itakaje igikombe cya Super Cup ya Espagne imbere ya mukeba Barcelona.
Mu itangazo ryasohowe n’iyi kipe kuri uyu wa Mbere, yemeje ko Álvaro Arbeloa wari usanzwe atoza ikipe y’abato (Real Madrid Castilla), ari we uhita ufata inshingano zo gusimbura Alonso.
Iyi kipe yagize iti "Real Madrid C.F itangaje ko mu bwumvikane bw’impande zombi, hafashwe umwanzuro wo gusoza igihe Xabi Alonso yari amaze ari umutoza w’ikipe nkuru."
Xabi Alonso w’imyaka 44 yari yageze muri Real Madrid mu mpeshyi y’umwaka ushize asimbuye Carlo Ancelotti, asinya amasezerano y’imyaka itatu. Nubwo yatangiye neza atsinda Clasico yo muri Ukwakira, ibintu byaje kuzamba mu Ugushyingo n’Ukuboza.
Gutakaza umukino wa nyuma wa Super Cup ku Cyumweru batsinzwe na FC Barcelona ibitego 3-2, ni yo yabaye imbarutso ya nyuma, ariko ibibazo byari bimaze igihe.
Amakuru avuga ko uretse umusaruro mubi warimo gutsindwa na Celta Vigo muri Shampiyona ndetse na Manchester City muri Champions League, Alonso yari amaze gutakaza icyizere cy’abakinnyi bakomeye.
Bivugwa ko umwuka wari mubi cyane hagati ye na Vinicius Junior, aho uyu munya-Brésil aherutse kubwira ubuyobozi ko atazongera amasezerano mu gihe Alonso akiri umutoza.
Abandi bakinnyi nka Fede Valverde na Jude Bellingham na bo bivugwa ko batari bishimiye imikinire ye n’uburyo atozamo ikipe.
Álvaro Arbeloa uhawe aka kazi, si mushya i Madrid kuko yahakinnye imikino 238 mu myaka irindwi, agatwarana na yo ibikombe bibiri bya Champions League. Yari amaze iminsi yitwara neza mu kipe y’abato aho yatwaye ibikombe bitatu (Treble) mu 2022-2023 n’igikombe cya Shampiyona mu 2024-2025 atoza Juvenil A.
Mu gusoza, Real Madrid yashimiye Alonso igira iti "Xabi Alonso azahora afite urukundo n’icyubahiro by’abafana ba Real Madrid kubera ko ari umunyabigwi wacu kandi wagaragaje indangagaciro z’ikipe. Real Madrid izahora ari mu rugo he."
Alonso asize Real Madrid ku mwanya wa kabiri muri La Liga, irushwa amanota ane na Barcelona.
