Ikipe y’Igihugu ya Nigeria "Super Eagles" yegukanye umwanya wa gatatu mu Gikombe cya Afurika cya 2025 kiri kubera muri Maroc, nyuma yo gutsinda Misiri kuri penaliti 4-2, mu mukino w’ishiraniro warangiye amakipe yombi anganyije ubusa ku busa mu minota isanzwe.
Umunyezamu wa Nigeria, Stanley Nwabali, ni we wabaye intwari y’uyu mukino wabereye i Casablanca kuri uyu wa Gatandatu, nyuma yo gukuramo penaliti ebyiri zikomeye harimo iya Mohamed Salah na Omar Marmoush, ibintu byahaye amahirwe Ademola Lookman yo kwinjiza penaliti ya nyuma yemeje intsinzi.
Iyi ntsinzi ije ikiza ibikomere by’Abanya-Nigeria baherukaga gusezererwa na Maroc muri ½ na none kuri penaliti, ikaba ishimangira agahigo k’amateka ka Nigeria kuko ari inshuro ya cyenda yegukanye umwanya wa gatatu (Bronze Medal) mu nshuro icyenda yageze kuri iki cyiciro.
Umutoza Eric Chelle yahisemo kuruhura ba kizigenza Victor Osimhen na Alex Iwobi, abanza mu kibuga ba rutahizamu Paul Onuachu na Akor Adams.
Nigeria yagaragaje inyota yo gutsinda kurusha Misiri, ndetse ibona uburyo bwinshi bwashoboraga kubyara igitego.
Habura iminota icyenda ngo igice cya mbere kirangire, Paul Onuachu yatsinze igitego ku mupira mwiza wa Samuel Chukwueze, ariko Umusifuzi Jalal Jayed aracyanga nyuma yo kwitabaza VAR, avuga ko habayeho ikosa kuri Hamdy Fathy.
Mu gice cya kabiri, Ademola Lookman winjiye asimbura, na we yatsinze igitego cyo ku mutwe ariko cyongera kwangwa kubera kurarira kwa Akor Adams.
Misiri yakomeje kugarira cyane, nubwo Mohamed Salah yagerageje uburyo bumwe bukomeye bwakuwemo na Nwabali.
Mu gutera penaliti, Nigeria yongeye kugira ibihe bigoye ubwo Fisayo Dele-Bashiru yahushaga iya mbere ikurwamo na Mostafa Shobeir. Gusa, Nwabali yahise yigaranzura Salah na Marmoush ba Misiri, mu gihe Akor Adams, Moses Simon, Alex Iwobi na Lookman bose binjije izabo neza.
Gutsindwa kwa Misiri bisobanuye ko Mohamed Salah akomeje gutegereza igikombe cye cya mbere cya Afurika, nyuma yo gutsindwa ku mukino wa nyuma muri 2017 na 2021, no gusezererwa muri ½ muri uyu mwaka.
Kuri iki Cyumweru, tariki ya 18 Mutarama 2026, amaso yose ahanzwei Rabat aho Sénégal yiteguye kwisobanura na Maroc (Yakiriye irushanwa) ku mukino wa nyuma uzagena uzegukana igikombe cya Afurika n’akayabo ka Miliyoni 10 z’Amadorali
