Ubuyobozi bw’Ikipe y’Ingabo z’Igihugu, APR FC, bwagize impinduka zikomeye, aho Brig Gen Deo Rusanganwa wari Chairman wayo yakuwe muri izo nshingano yari amazemo amezi 13, asimburwa by’agateganyo na Col (Rtd) Vincent Mugisha.
Aya makuru yatangiye gucicikana ku gicamunsi cyo kuri uyu wa Kabiri tariki 9 Ukuboza 2025, bihereye kuri Radio Isibo, yemeza ko Brig Gen Rusanganwa atagifite inshingano zo kuyobora iyi kipe yambara umweru n’umukara.
Bivugwa ko impamvu nyamukuru yatumye agirwa inama yo guhagarika izi nshingano ari ukugira ngo arusheho kwita ku mirimo ye ya gisirikare, dore ko asanzwe ari Umuyobozi wa Diviziyo ya Kabiri mu Ngabo z’u Rwanda ishinzwe ibikorwa bya gisirikare mu Ntara y’Amajyaruguru.
Mu gihe hagitegerejwe umuyobozi mushya ushobora kurambana n’iyi kipe, Col (Rtd) Vincent Mugisha usanzwe ari Umunyamabanga Mukuru w’iyi kipe, ni we wahise ahabwa inkoni y’ubuyobozi by’agateganyo.
Ku rundi ruhande, hari amakuru yatangajwe na Radio BB FM, ko Maj Gen Alexis Kagame, Umugaba w’Inkeragutabara, ashobora kugaruka kuyobora iyi kipe yigeze kugiriramo ibihe byiza hagati ya 2004 na 2013, akayihesha ibikombe byinshi birimo birindwi bya Shampiyona na bibiri bya CECAFA Kagame Cup.
Brig Gen Deo Rusanganwa yageze ku buyobozi bwa APR FC mu Ugushyingo 2024 asimbuye Col (Rtd) Richard Karasira.
Mu gihe cy’umwaka n’ukwezi kumwe yari amaze ayobora iyi kipe, yayihesheje ibikombe bitatu bikomeye birimo icya Shampiyona y’umwaka ushize, Igikombe cy’Amahoro ndetse n’Igikombe cy’Intwari.
Izi mpinduka zije mu gihe APR FC iri ku mwanya wa kabiri muri Shampiyona y’uyu mwaka, aho irushwa amanota ane na Police FC iyoboye urutonde, gusa Ikipe y'Ingabo ikaba izigamye umukino umwe.
By’umwihariko, uyu muyobozi avuyeho mu gihe FERWAFA imaze gutangaza ko tariki 10 Mutarama 2026 ari bwo APR FC izacakirana na Rayon Sports mu mukino w’Igikombe kiruta ibindi "Super Cup".
Col (Rtd) Vincent Mugisha ugiye kuyobora ikipe by'agateganyo
