Ikipe ya Al Hilal SC yo muri Sudani ikomeje kugorwa n’imikino ya Shampiyona y’u Rwanda, aho yatsinzwe umukino wa kabiri yikurikiranya, nyuma yo guhirikwa na Kiyovu Sports ibitego 2-1 mu mukino w’Umunsi wa 12.
Iyi kipe yari yihagazeho mu gice cya mbere, yasanze ibintu byahindutse mu cya kabiri, bituma itakaza amanota atatu yiyongera ku yo iheruka gutakaza imbere ya Rutsiro FC, na yo yari yayitsinze 2-1.
Muri uyu mukino wabereye kuri Kigali Pelé Stadium ku mugoroba wo kuri uyu wa Kane, Al Hilal yatangiye yotsa igitutu Urucaca, ibona igitego hakiri kare ku munota wa 16 gitsinzwe na Ousmane Diouf n’umutwe, ku mupira wavuye muri koruneri.
Gusa, amakosa mu bwugarizi bwa Al Hilal n’impinduka zakozwe na Kiyovu Sports, byahinduye isura y’umukino. Ku munota wa 63, myugariro Lusolo Ernest yakoze ikosa ryo gusubiza umupira inyuma nabi, Mutunzi Darcy araryama awuboneza mu izamu, yishyurira Urucaca.
Habura iminota 11 ngo umukino urangire, Uwineza René yabonye umunyezamu Mohamed Madani ahagaze nabi, amutera umupira muremure (lob), atsinda igitego cya kabiri cyashimangiye intsinzi ya Kiyovu Sports.
Iki gitego cyakoze ku mutima Perezida wa Gasogi United, Kakooza Nkuriza Charles (KNC) wari wibereye ku kibuga.
Nubwo Uwineza atahawe igihembo cy’umukinnyi mwiza w’umukino, KNC yahise amugenera ibihumbi 100 Frw nk’ishimwe ry’ubwo buhanga yagaragaje n’uburyo yafashije ikipe ye.
Kiyovu Sports yafashe umwanya wa kane n’amanota 19, mu gihe Al Hilal ari iya 16 n'amanota 10.
Shampiyona irakomeza kuri uyu wa Gatanu, aho AS Kigali yakira Bugesera FC saa Cyenda, naho umukino witezwe na benshi ukaza guhuza Gorilla FC na Rayon Sports saa Kumi n'Ebyiri n'igice. Iyi mikino yombi irabera kuri Kigali Pelé Stadium.
