‎Rutahizamu wo ku ruhande wa Rayon Sports, Aziz Bassane Koulagna, yagarutse mu myitozo nyuma yo gukurirwaho ibihano yari yarafatiwe kubera imyitwarire mibi, kugira ngo afashe bagenzi be kwitegura umukino w'ishiraniro uzabahuza na APR FC kuri uyu wa Gatandatu tariki 2 Gicurasi 2026 kuri Sitade Amahoro.

‎

‎Uyu mukinnyi yari yafatiwe ibihano n'ubuyobozi bwa Rayon Sports tariki 21 Mata 2026 biturutse ku myitwarire idahwitse yagaragaje mbere y'umukino iyi kipe yanganyijemo na Rutsiro FC 0-0 tariki 19 Mata 2026. 

‎

‎Amakuru avuga ko uyu musore yaraye mu kabari anywa inzoga mbere y'uwo mukino, ibintu byagize ingaruka mbi ku myitwarire ye mu kibuga.

‎

‎Nyuma yo guhanwa, uyu rutahizamu yanditse ibaruwa isaba imbabazi bituma abatoza n'ubuyobozi bamubabarira asubira mu myitozo y'ikipe yatangiye kuri uyu wa Mbere, akayisubukura ku wa Kabiri.

‎

‎Kugaruka kwa Bassane ndetse n'abandi bakinnyi barimo Faustin Likau Kitoko bari barashyizwe ku ruhande n'umutoza Haringingo Francis, byongereye imbaraga mu busatirizi ndetse n'ibyishimo mu bakinnyi biteguye uyu mukino mu buryo budasanzwe nyuma y'igihe batabasha gutsinda APR FC.

‎

‎Rayon Sports igiye guhura na mukeba wayo iri ku mwanya wa kane n'amanota 47, aho irushwa amanota umunani na APR FC iri ku mwanya wa kabiri. Mu mikino itanu iheruka guhuza aya makipe muri Shampiyona, APR FC yatsinzemo imikino ibiri banganya itatu.

‎

‎Umukino uheruka guhuza impande zombi warangiye APR FC inyagiye Rayon Sports ibitego 4-1. Ikipe ya Rayon Sports iheruka gukura amanota atatu kuri mukeba wayo muri Shampiyona tariki 12 Gashyantare 2023, ubwo yayitsindaga igitego 1-0.