‎Ikipe ya Paris Saint-Germain yanyagiye Chelsea ibitego 5-2 mu mukino ubanza wa 1/8 cya UEFA Champions League wabereye kuri Parc des Princes imbere ya Perezida Paul Kagame wari mu banyacyubahiro bawitabiriye.

‎

‎Ubutumwa bwashyizwe ku rubuga rwa X n'Ibiro by'Umukuru w'Igihugu bugaragaza ko Perezida Kagame yarebye uyu mukino mu ijoro ryo ku wa Gatatu tariki ya 11 Werurwe 2026, ashyigikira iyi kipe y'i Paris isanzwe ifitanye amasezerano y'ubufatanye n'u Rwanda binyuze muri gahunda ya Visit Rwanda.

‎

‎Aya masezerano yasinywe bwa mbere mu 2019 akavugururwa mu 2025 kugeza mu 2028, agena ko PSG yamamaza Visit Rwanda ku kibuga cyayo ndetse ikambara imyambaro ibyanditseho mu myitozo, ibintu byatumye u Rwanda rumenyekana ku rwego mpuzamahanga ndetse abana barenga 400 bakaba barabashije guhabwa imyitozo binyuze muri PSG Academy Rwanda.

‎

‎Muri uyu mukino wari witezweho guhangana gukomeye imbere y'Umukuru w'Igihugu cy'u Rwanda n'abandi bafana, PSG yafunguye amazamu hakiri kare ku munota wa 10 ku gitego cyatsinzwe na Bradley Barcola wateye ishoti rikomeye nyuma yo guhabwa umupira na Ousmane Dembele wari uvuye ku mutwe wa Joao Neves.

‎

‎Chelsea ntiyacitse intege kuko yishyuye binyuze kuri Malo Gusto wateye ishoti rikomeye umunyezamu Matvei Safonov ananirwa kurikuramo, ariko ibyishimo byabo ntibyamaze kabiri kuko Ousmane Dembele yahise azamukana umupira asiga Wesley Fofana atsindira PSG igitego cya kabiri.

‎

‎Mu gice cya kabiri, Chelsea yongeye kwishyura binyuze kuri Enzo Fernandez washyizemo igitego cya kabiri ahawe umupira na Pedro Neto wari umaze kuwambura Desire Doue mu kibuga hagati.

‎

‎Ibi byatumye umutoza wa PSG, Luis Enrique, akora impinduka akuramo Doue ashyiramo Khvicha Kvaratskhelia, ari na zo zahinduye isura y'umukino mu buryo bukomeye bituma bigaranzura umukino burundu.

‎

‎Amakosa y'umunyezamu wa Chelsea, Filip Jorgensen, ni yo yabaye intandaro yo gutsindwa icya gatatu ubwo yatangaga umupira nabi ufatwa na Barcola awuhereza Vitinha wamurobye biba ibitego 3-2.

‎

‎Nyuma y'iminota mike, Khvicha Kvaratskhelia wari winjiye asimbuye yigaragaje atsinda ibitego bibiri byikurikiranya mu minota ya nyuma, harimo ishoti riremereye yateye ari inyuma y'urubuga rw'amahina n'ikindi yatsinze arobye umunyezamu biba ibitego 5-2.

‎

‎Umukino warangiye mu mwuka mubi nyuma y'uko Pedro Neto asunitse umwana utoragura imipira wa PSG amugusha ku byapa byamamaza ibyateje imvururu mu kibuga, kandi nubwo yasabye imbabazi nyuma y'umukino ashobora gufatirwa ibihano n'Impuzamashyirahamwe y'Umupira w'Amaguru i Burayi (UEFA).

‎

‎Umutoza wa Chelsea, Liam Rosenior, yemeye ko amakosa bakoze yatumye bahanwa. Yagize ati “Mu minota 75 twakinnye neza, ariko mu minota 15 ya nyuma twakoze amakosa akomeye yatumye duhanwa. Ntidukwiye gucika intege, ahubwo tugomba kwitegura neza umukino wo kwishyura.”

‎

‎Chelsea izakira PSG mu mukino wo kwishyura uzabera kuri Stamford Bridge ku wa Kabiri tariki ya 17 Werurwe 2026, ariko mbere y'uwo mukino ikazabanza kwakira Newcastle United muri Premier League ku wa Gatandatu.