Kapiteni w'ikipe ya Chelsea, Reece James, yasinye amasezerano mashya y'imyaka itandatu azamugeza mu mpeshyi y'umwaka wa 2032 akinira iyi kipe y'i Londres mu Bwongereza.

‎

‎Uyu myugariro w'imyaka 26 y'amavuko yageze muri Chelsea afite imyaka itandatu gusa y'amavuko, ubu akaba yasinye amasezerano ajyanye n'umurongo mushya w'imishahara ishingiye ku musaruro washyizweho n'ubuyobozi bushya guhera muri Gicurasi mu 2022.

‎

‎Mbere y'uku kongera amasezerano, James ni we mukinnyi rukumbi wari usigaye muri Chelsea ugengwa n'amasezerano yasinwe ku ngoma y'ubuyobozi bucyuye igihe, ibintu byatumye ubuyobozi bushya bwihutira kumugumisha muri iyi kipe kimwe n'abandi bakinnyi ngenderwaho bamaze kongererwa amasezerano azabageza nibura mu 2030.

‎

‎Kuva yagirwa kapiteni asimbuye Cesar Azpilicueta muri Nyakanga 2023, James amaze gukinira Chelsea imikino 225 mu marushanwa yose, akayitsindira ibitego 16 ndetse anatanga imipira 31 yavuyemo ibitego.

‎

‎Mu bikombe bitanu amaze kwegukana harimo icya UEFA Champions League cya 2021, Super Cup ya 2022 ndetse na Conference League yegukanye nyuma y'imyaka itatu, agahita atwara n'Igikombe cy'Isi cy'Amakipe mu 2025, ubu akaba ari na we mukinnyi wenyine usigaye mu batwaye Champions League mu 2021.

‎

‎Nyuma yo guhangana n'imvune zabangamiye imyaka ye ya mbere ku ngoma ya Todd Boehly na Clearlake, James yongeye kwigaragaza mu mezi 15 ashize, aho yakinnye imikino 35 muri uyu mwaka, bituma anagirirwa icyizere n'umutoza Thomas Tuchel nk'umukinnyi ubanza ku ruhande rw'iburyo mu Ikipe y'Igihugu y'u Bwongereza yitegura Igikombe cy'Isi.

‎

‎Kuri ubu Chelsea iri ku mwanya wa gatanu muri Premier League, ikaba yitegura kwakira Newcastle United kuri uyu wa Gatandatu mbere yo gukina umukino wo kwishyura wa 1/8 cya Champions League izakiramo PSG kuri Stamford Bridge mu cyumweru gitaha.