Ikipe y’Igihugu ya Tanzania izwi nka Taifa Stars yasesekaye mu Mujyi wa Kigali aho yitabiriye imikino mpuzamahanga ya gicuti ya FIFA Series 2026 igiye guhuza ibihugu umunani.
Iyi kipe ni yo yasoje urutonde rw'ibihugu byose byagombaga kugera mu Rwanda yitabiriye iri rushanwa, ikaba yahageze ku mugoroba wo ku wa Kabiri.
Umutoza w'iyi kipe yazanye abakinnyi bakomeye basanzwe bafite amazina akomeye mu gihugu barimo umunyezamu wa Simba SC, Aishi Manula ndetse na Feisal Salum uzwi cyane nka Fei Toto.
Urutonde rw'ibihangange bya Taifa Stars byageze i Kigali kandi ruriho Mohamed Hussein Zimbwe, Bakari Nondo Mwamnyeto, Mdathir Yahya Abbas ndetse na Iddy Nado.
Tanzania iherereye mu Itsinda B rigomba gukinira imikino yaryo kuri Kigali Pelé Stadium i Nyamirambo guhera ku wa Kane tariki ya 26 Werurwe 2026.
Iri tsinda kandi ririmo Macau, Aruba ndetse na Liechtenstein, ni ryo rizafungura iyi mikino ku mugaragaro guhera Saa Saba n’Igice z'amanywa (13:30).
Itsinda A rigizwe n’Ikipe y’Igihugu y’u Rwanda ‘Amavubi’, Estonia, Grenada na Kenya rizakinira imikino yaryo kuri Stade Amahoro, iyi ikaba izatangira ku wa Gatanu guhera Saa Kumi n’Ebyiri z’umugoroba (18:00).
Abakunzi ba ruhago bifuza kureba iyi mikino yose basabwe kugura amatike bifashishije telefoni zabo bakanda *939*3*2#, bagakurikiza amabwiriza.
Leave a Comment