Kenya yaturutse inyuma yigaranzura Amavubi mu gice cya kabiri, iyatsinda ibitego 2-1 mu mukino wa kabiri wo mu itsinda A rya CECAFA U17 wabaye ku gicamunsi cyo kuri uyu wa Gatanu muri Ethiopia.
Ugutsindwa ku Rwanda kubaye ukwa kabiri kwikurikiranya, mu gihe Kenya yo yahise igira amanota ane.
Umukino watangiye nta kipe n'imwe ubona ko iri kurusha indi bigaragara. Iminota 20 ya mbere yaranzwe n'umukino w'imbaraga nyinshi ndetse n'amakosa ya buri kanya, ibyatumaga umupira udatemberezwa.
Icyakora u Rwanda rwaje kubona uburyo bwiza hakiri kare, maze ifungura amazamu. Ku munota wa 35, Mugunga Daniel yatangije contre-attaque ikomeye yashyiriye ku kirenge Nshimiyimana Olivier, maze ahita ashyira umupira mu nshundura, igice cya mbere kirangira ari igitego 1-0.
Mu gice cya kabiri, Umutoza wa Kenya, William Muluya, yakoze impinduka mu busatirizi, ashyiramo rutahizamu Nicholas Ochola. Izi mpinduka zatanze umusaruro.
Nyuma y'umwanya munini ingimbi za Kenya zihererekanya neza, Armstrong Omondi yazamuye imbere y'izamu umupira ugendera hasi, myugariro w'Amavubi awukoraho, usanga Nicholas Ochola wagiye mu kibuga asimbuye, agomborera ikipe ye.
Iki gitego cyongeye akanyabugabo mu basore ba Kenya, barushaga Amavubi cyane muri iyi minota. Iki gitutu cyatanze umusaruro ku munota wa 77 ubwo Ochola yatangaga umupira wavuyemo icya kabiri. Yirukankanye umupira ku ruhande rw'iburyo, awuha Trevor Nasasiro wari imbere y'izamu ahita asoza akazi.
Amavubi yahuzagurikaga kubera umunaniro yashoboraga kuvumbwa igitego cya gatatu ku munota wa 87, ariko uguhererekanya neza kwa Julius Buong, Nathan Achola na Armstrong Omondi ntikwatanga umusaruro kuko Omondi yateye hejuru y'izamu umupira yari ahawe.
Umukino warangiye Amavubi atsinzwe ibitego 2-1. U Rwanda ruzasubira mu kibuga ku wa Mbere, tariki ya 24 Ugushyingo 2025, rukina na Somalia, mu gihe Kenya yo izakina na Sudani y'Epfo.
Leave a Comment