‎Ikipe ya APR FC yasinyishije umunyezamu w'Ikipe y'Igihugu ya Mozambique, Ernan Siluane ndetse n'umukinnyi ukina asatira ukomoka muri Mali, Mamadou Traore, mu rwego rwo kongera imbaraga yitegura amarushanwa y'umwaka utaha.
‎
‎Ernan Siluane w'imyaka 27 yahawe amasezerano y'imyaka ibiri avuye mu ikipe ya Black Bulls yari aherutse gufasha kwegukana ibikombe iwabo. Uyu munyezamu ureshya na metero 1,86 amaze gukinira Mozambique inshuro zirenga 24 ndetse yayifashije mu marushanwa abiri aheruka y'Igikombe cya Afurika.
‎
‎Mamadou Traore na we w'imyaka 27 yahawe amasezerano y'imyaka ibiri nyuma yo kwigaragaza nka kapiteni w'ikipe ya Stade Malien iwabo muri Mali.
‎
Uyu mukinnyi ukina hagati asatira yafashije iyi kipe yahoze akinira kugera mu mikino ya 1/4 cya CAF Champions League mbere yo kwerekeza mu Rwanda.
‎
Azanye ubunararibonye yakuye mu makipe arimo JS Kabylie yo muri Algeria na Menemen FK yo muri Turukiya ndetse no mu Ikipe y'Igihugu ya Mali y'abatarengeje imyaka 20.
‎
‎Aba bakinnyi b'abanyamahanga baje basanga abandi bashya baherutse kwerekanwa barimo Ishimwe Christian, Uwiyaremye Fidali, Rubuguza Jean Pierre ndetse na Amani Kouadiokan Michel Breygeneve.
‎
‎Iyi Kipe y'Ingabo z'Igihugu izahagararira u Rwanda muri CECAFA Kagame Cup izatangira tariki 24 Nyakanga kugeza tariki 8 Kanama, ndetse na CAF Champions League izitabira.