U Rwanda rukomeje kugaragaza imbaraga mu kumenyekanisha igihugu binyuze muri siporo, aho Nate Ament, umukinnyi ukiri muto wa basketball ufite inkomoko y’u Rwanda, yagizwe Ambasaderi wa mbere wa Visit Rwanda mu bijyanye na basketball ku rwego mpuzamahanga.
Ament w’imyaka 19 ni umukinnyi ukina nka forward, wavukiye muri Leta Zunze Ubumwe za Amerika ku mubyeyi w’Umunyarwandakazi n’umunyamerika. Yabaye umwe mu bakinnyi bari bafite izina rikomeye muri basketball yo muri za kaminuza, aho yakiniraga University of Tennessee Volunteers. Mu mwaka we wa nyuma muri kaminuza yatsinze impuzandengo y’amanota 16.7 kuri buri mukino, akagira n’amanota yo gufata imipira (rebounds) 6.3 ndetse na assists 2.3.
Nate Ament yatoranyijwe muri NBA Draft 2026 ku mwanya wa 13 mu cyiciro cya mbere. Yatoranyijwe na Miami Heat, ariko uburenganzira bwe bwo kumukoresha bwahise bujya muri Milwaukee Bucks nyuma y’ubucuruzi bukomeye bw’umukinnyi Giannis Antetokounmpo.
Milwaukee Bucks imureba nk’umwe mu bakinnyi bazafasha ikipe gutangira igice gishya nyuma yo gutandukana na Giannis. Ament azaba afite inshingano zo kugaragaza impano ye muri NBA kandi ikipe imwitezeho kuzamuka uko iminsi igenda.
Ament yagiye agaragaza ko yishimira inkomoko ye y’u Rwanda, ndetse yavuze ko yakwemera gukinira ikipe y’igihugu y’u Rwanda igihe byamugeraho. Ibi byatumye benshi mu bakunzi ba basketball mu Rwanda bamubona nk’umukinnyi ushobora kuzagira uruhare runini mu iterambere rya basketball y’igihugu.
Visit Rwanda ikomeje gukoresha amazina akomeye muri siporo kugira ngo imenyekanishe igihugu ku isi, kandi Nate Ament ashobora kuba umwe mu maso mashya azahuza u Rwanda n’umuryango mugari wa basketball mpuzamahanga.
