Ishyirahamwe ry'Umupira w'Amaguru mu Rwanda (FERWAFA) ryamenyesheje ikipe ya Rayon Sports ko idashobora guhabwa ibyangombwa byemerera Haringingo Francis Christian kuyitoza kuko akurikiranyweho ikibazo cy'amasezerano na Kiyovu Sports aherutse kuvamo yikuye mu kazi.
Ibi bikubiye mu ibaruwa yashyizweho umukono n'Umunyamabanga Mukuru wa FERWAFA, Bonnie Mugabe, ku wa Gatanu tariki ya 3 Mata 2026, asubiza ubusabe bwa Rayon Sports bwo ku wa 2 Mata 2026 bwasabaga ko uyu mutoza w'Umurundi ahabwa ibyangombwa.
FERWAFA yatangaje ko yasuzumanye ubwitonzi ubusabe bwa Rayon Sports ibuhuza n'ikirego Kiyovu Sports yatanze isaba ko uyu mutoza atandikwa.
Ibaruwa igira iti "FERWAFA yifuje kubamenyesha ko Umutoza Haringingo kuri ubu afitanye ikibazo cy’amasezerano n’ikijyanye n’imiyoborere na Kiyovu Sports. Iki kibazo gifitanye isano no kuva kwe muri iyi kipe ndetse kizahabwa umurongo."
Hashingiwe ku gika cya mbere n'icya kabiri bigize ingingo ya 28 y'amategeko agenga ibijyanye n'ihererekanya ry'abakinnyi n'abatoza, FERWAFA yemeje ko itemerewe gutanga ibi byangombwa.
Iyi ngingo ivuga ko amasezerano y'akazi ata agaciro iyo arangiye cyangwa asheshwe ku bwumvikane kandi akaba adashobora guseswa n'uruhande rumwe mu gihe cy'irushanwa.
Ishyirahamwe ry'Umupira w'Amaguru mu Rwanda ryashimangiye ko "Itangwa ry’uru ruhushya rizakomeza gusubikwa kugeza igihe amakimbirane hagati ya Haringingo Christian Francis na Kiyovu Sports azakemukira mu buryo bwemewe n’amategeko."
Ryasabye impande zose kwicara zigakemura iki kibazo mu bwumvikane binyuze mu biganiro.
Kudahabwa ibyangombwa bivuze ko Haringingo wagarutse muri Gikundiro ku wa Kabiri tariki ya 31 Werurwe asimbuye Bruno Ferry, ataza kugaragara ku ntebe y'abatoza kuri uyu wa Gatandatu saa 18:30, ubwo Rayon Sports iza kuba yakiriye Gicumbi FC kuri Kigali Pelé Stadium mu mukino w'umunsi wa 26 wa Shampiyona.
Iki cyemezo kije nyuma y'uko ku wa Gatanu Perezida wa Kiyovu Sports, Nkurunziza David, yatangaje ko ibyakozwe na Rayon Sports itwara uyu mutoza wari usigaje amezi abiri ku masezerano ari agasuzuguro kagereranywa n'umuco wa kera wo "guterura".
Kugeza ubu Kiyovu Sports yamaze no kugeza iki kirego mu Ishyirahamwe ry'Umupira w'Amaguru ku Isi (FIFA).
