Ikipe ya Paris Saint-Germain yasezereye Liverpool mu mikino ya UEFA Champions League ku nshuro ya kabiri yikurikiranya nyuma yo kuyitsinda ibitego 2-0 mu mukino wo kwishyura wa 1/4 wabereye kuri Stade Anfield, bityo iyisezerera ku giteranyo cy'ibitego 4-0.
Uyu mukino wabaye ku wa Kabiri tariki ya 14 Mata 2026, watangiye Liverpool yari yatsinzwe ibitego 2-0 mu mukino ubanza i Paris ishakisha uko yakwishyura.
Icyakora PSG ni yo yagaragaje ubukana mu gice cya mbere n'ubwo umunyezamu Giorgi Mamardashvili yakuyemo amashoti ya Khvicha Kvaratskhelia na Ousmane Dembélé.
Ku munota wa 30, Liverpool yagize ibyago ubwo rutahizamu wayo Hugo Ekitiké yavunikaga umutsi wo ku gatsinsino bikomeye agasimbuzwa Mohamed Salah. Iyi kipe yanabuze igitego cyabazwe mbere y'uko igice cya mbere kirangira ubwo Marquinhos yakuragaho umupira wa Virgil van Dijk wari ugiye mu nshundura.
Mu gice cya kabiri umutoza wa Liverpool Arne Slot yakoze impinduka, akura mu kibuga Alexander Isak na Jeremie Frimpong ashyiramo Cody Gakpo na Joe Gomez.
Ibi byatumye Liverpool yotsa igitutu PSG ndetse ku munota wa 65 ihabwa penaliti nyuma y'ikosa Willian Pacho yari akoreye kuri Alexis Mac Allister, ariko umusifuzi Maurizio Mariani ayikuraho yifashishije VAR.
Icyizere cya Liverpool cyayoyotse ku munota wa 72 ubwo Ousmane Dembélé uherutse kwegukana Ballon d'Or yafunguraga amazamu ku ishoti rikomeye yatereye inyuma y'urubuga rw'amahina ahawe umupira na Kvaratskhelia.
Uyu Mufaransa yashimangiye intsinzi ku munota wa 90+1 atsinda igitego cya kabiri ku mupira yahawe na Bradley Barcola.
Kuvamo kwa Liverpool bivuze ko izasoza uyu mwaka w'imikino nta gikombe na kimwe yegukanye, ndetse isigaje urugamba rwo gushaka itike ya Champions League y'umwaka utaha.
Ku rundi ruhande Paris Saint-Germain yiteguye guhura n'ikipe izarokoka hagati ya Bayern Munich na Real Madrid muri 1/2.
